Forca e Sigurisë së Kosovës vazhdon të tërheqë interesim të lartë nga të rinjtë që synojnë një karrierë në fushën e mbrojtjes dhe sigurisë. Konkursi i fundit për pranimin e kadetëve ka zgjuar interesim të madh, me 234 kandidatë që kanë aplikuar për vetëm 44 vende të lira.
Afati i aplikimit, i hapur nga Ministria e Mbrojtjes dhe FSK-ja, ka përfunduar sot, ndërsa numri i aplikimeve tregon konkurrencë të fortë për secilin vend të ofruar. Kadetët e përzgjedhur do të kenë mundësi të ndjekin studimet në Qendrën e Studimeve Universitare të FSK-së, si dhe në akademi ushtarake jashtë vendit, përfshirë Turqinë, Shqipërinë, Kroacinë dhe Maqedoninë e Veriut.
Me më shumë se pesë aplikantë për një vend, ky konkurs konsiderohet ndër më konkurruesit e viteve të fundit. Institucionet e sigurisë e shohin këtë si tregues të rritjes së interesimit të të rinjve për profesionin ushtarak dhe të besimit në misionin e FSK-së.
Njohës të fushës së sigurisë vlerësojnë se ky trend është një sinjal pozitiv për të ardhmen e sektorit të mbrojtjes në Kosovë, pasi tregon gatishmërinë e gjeneratave të reja për t’i shërbyer vendit dhe për të kontribuar në zhvillimin e kapaciteteve të tij mbrojtëse.
